വേണം കാര്‍ഷികരംഗത്ത് ഒരു ബദല്‍

തച്ചുടക്കലിന്‍ തത്വശാസ്ത്രങ്ങള്‍ക്ക് അപ്രാപ്യമായ കൊച്ചു തുരുത്തില്‍ അഭയം പ്രാപിക്കാന്‍ മുമ്പൊരിക്കല്‍ നമ്മുടെ ഒരു കാല്പനികകവി കൊതിക്കുകയുണ്ടായി . വിപ്ലവത്തെ സ്വപ്നം കണ്ട ഒരു പൂര്‍വ്വാശ്രമം ഈ കവിക്കും ഉണ്ടായിരുന്നു. കേരളം തച്ചുടക്കലിന്റെ മഹോത്സവം ആഘോഷിക്കുന്ന ഈ വേളയില്‍ കവികളാകട്ടെ രാഷ്ട്രീയപ്രവര്‍ത്തകരാകട്ടെ പൊതുജനങ്ങളാകട്ടെ ആരും തന്നെ എവിടെയും അഭയം തേടാനാഗ്രഹിക്കുന്നില്ല . കൌതുകകരമാണിത് . നിയമവിരുദ്ധമായി ഭൂമി കൈവശം വെച്ചവര്‍ ഒഴികെ ആരും ഈ ഇടിച്ചു നിരത്തലിനെതിരെ പരസ്യമായി രംഗത്തു വരാതിരിക്കത്തക്കവിധം ശക്തമായ ജനവികാരം ഇക്കാര്യത്തിലുണ്ടായി. മലയാളികള്‍ ഇടിച്ചുനിരത്തല്‍ മനോഭാവമുള്ള സമൂഹമായി എന്നാണോ നാം ഇതില്‍ നിന്ന് മനസ്സിലാക്കേണ്ടത്?

കുട്ടനാട്ടിലെ കൃഷിഭൂമി കാര്‍ഷികേതര ആവശ്യങ്ങള്‍ക്കായി ഉപയോഗിക്കുന്നതിനെതിരെ, പാടങ്ങള്‍ നിരത്തുന്നതിനെതിരെ വെട്ടിനിരത്തല്‍ സമരം നടത്തിയ അതേ നേതാവാണ് ഇന്ന് ഇടിച്ചു നിരത്തലിന്റെ താത്വികവും പ്രായോഗികവുമായ നേതൃത്വത്തിലുള്ളത്. വെട്ടിനിരത്തല്‍ ഒരു സാമൂഹികാതിക്രമമായി ചിത്രീകരിക്കാന്‍ അന്ന് മാദ്ധ്യമങ്ങളും രാഷ്ട്രീയപാര്‍ട്ടികളും ശ്രമിച്ചു. അങ്ങനെ വിശ്വസിക്കാന്‍ അക്കാലത്ത് മലയാളികള്‍ക്ക് വിഷമമുണ്ടായില്ല. സര്‍ക്കാര്‍ വെട്ടിനിരത്തല്‍ നടത്തുന്നത് പതിവില്ലാത്തതാണ്. നിയമം നിയമത്തിന്റെ വഴിക്കു പോകും എന്നു പ്രഖ്യാപിക്കുകയാണ് പതിവ്. എല്ലാ അനീതിയും അഴിമതിയും നിയമത്തിന്റെ വഴിക്കു പോയി ബലിഷ്ഠമാകുന്നത് കണ്ടു മടുത്ത സമൂഹമാണ് നിയമലംഘനത്തെ നിഷ്കരുണം കൈകാര്യം ചെയ്യുന്ന നടപടിയെ പിന്തുണയ്ക്കുന്നത്.

നിവൃത്തികേടുകൊണ്ട് അഴിമതി കാണിച്ച് പുലരേണ്ട അവസ്ഥയിലാണ് കേരളീയ സമൂഹം. സര്‍വ്വീസ് സംഘടനകളും ട്രെയ്‌ഡ് യൂനിയനുകളും ചേര്‍ന്നു സംരക്ഷിക്കുന്ന അഴിമതിക്കാരുടെ വന്‍പടയെ ചെറുക്കാനാകാത്ത വ്യക്തികളുടെ ധര്‍മ്മരോഷം ഇതിനു മുമ്പ് കാണാനായത് സര്‍ക്കാര്‍ ജീവനക്കാര്‍ സമരം ചെയ്തപ്പോഴാണ്. എ.കെ.ആന്റണി അന്ന് മുഖ്യമന്ത്രി. ആവശ്യങ്ങള്‍ അംഗീകരിക്കാവുന്ന അവസ്ഥയിലല്ലെന്നും സര്‍ക്കാരാപ്പീസുകള്‍ അടഞ്ഞു കിടന്നാല്‍ ജനത്തിനു പ്രശ്നമൊന്നുമുണ്ടാകില്ലെന്നും മുഖ്യമന്ത്രി പറഞ്ഞു. സമയത്ത് ആപ്പീസില്‍ പോകാതിരിക്കുകയും നേരത്തിനു മുമ്പേ തിരിച്ചു പോരുകയും ഏത് ജോലി ചെയ്യാനാണോ ശമ്പളം വാങ്ങുന്നത് അത് ചെയ്യാന്‍ പൊതുജനങ്ങളില്‍ നിന്ന് കൈക്കൂലി വാങ്ങുകയും ചെയ്യുന്ന സര്‍ക്കാര്‍ സര്‍വ്വീസ് പൊതുജനരോഷത്തിനു മുമ്പില്‍ കീഴടങ്ങിയ ആ ചരിത്രസംഭവത്തെ തുടര്‍ന്ന് പല സംഘടനകളും അഴിമതിയുടെ പേരില്‍ ജനങ്ങളുടെ ശത്രുവാകാതിരിക്കാനെന്തു ചെയ്യാം എന്നു പരസ്യമായി ആലോചിക്കുക പോലും ചെയ്തു.

പൊതുജനവികാരത്തിന്റെ പ്രകടനമാണ് നാമിപ്പോള്‍ കേരളത്തില്‍ കാണുന്നത്. ഇത് ആരുടെ നേട്ടമാണ് എന്ന് പൊതുജനങ്ങള്‍ക്ക് സംശയമില്ല. സ്വന്തം ചുമതലയില്‍ വകുപ്പില്ലാതെ മുഖ്യമന്ത്രിയെ ഇരുത്തി, മന്ത്രിസഭാനുമതിയില്ലാതെ ലോകബാങ്ക് ലോണ്‍ നടപടിയുമായി മുന്നേറിയവര്‍ക്കാണോ ഇതിന്റെ ക്രഡിറ്റ് അതോ മറ്റാര്‍ക്കെങ്കിലുമോ എന്ന് പഠിപ്പിക്കാന്‍ ഒരു കൌശലത്തിനും സാദ്ധ്യമല്ല. ജനവികാരം അറിയുകയും ജനങ്ങളോട് പ്രതിജ്ഞാബദ്ധത പുലര്‍ത്തുകയും ചെയ്യുന്ന ഒരാളില്‍ നിന്നേ ഇത്തരം നടപടിയുണ്ടാകൂ എന്നു മനസ്സിലാക്കാന്‍ മാര്‍ക്സിസം ലെനിനിസം പഠിക്കേണ്ട കാര്യമെന്നുമില്ല.

പാടങ്ങള്‍ നികത്തുന്നതിന് എതിരെ,കൃഷിഭൂമി കാര്‍ഷികേതര ആവശ്യങ്ങള്‍ക്ക് ഉപയോഗിക്കുന്നതിനെതിരെ സമരം ചെയ്യുന്ന ഒരാള്‍ ഇടിച്ചു നിരത്തലിന്റേയോ വെട്ടിനിരത്തിലിന്റേയോ രാഷ്ട്രീയം മാത്രമുള്ളവനായിരിക്കില്ല എന്ന് ഉറപ്പാണ്. കൃഷി ആദായകരമല്ല എന്നതിനാല്‍ , അല്ലെങ്കില്‍ കാര്‍ഷികരംഗത്തെ ട്രേഡ് യൂനിയന്‍ വിലപേശലിനെ ചെറുക്കാന്‍ കൃഷിയില്‍ നിന്ന് പിന്‍വാങ്ങുന്ന കര്‍ഷകന്‍ ഒരു പക്ഷെ തന്റെ സ്വാതന്ത്ര്യമാണ് തിരിച്ച് ഒരു വിലപേശലിനായി ഉപയോഗപ്പെടുത്തുന്നത്. കേരളത്തില്‍ ഇന്ന് കാര്‍ഷികരംഗം ദുര്‍ബലമായതിന് വേറെയും കാരണങ്ങള്‍ പറയാം. എന്നാല്‍ കാര്‍ഷികോല്പാദനമില്ലാതെ ഒരു സമൂഹത്തിന് നിലനില്ക്കാനാകില്ല എന്നത് എല്ലാവര്‍ക്കും അറിയാവുന്ന കാര്യമാണ്. കൃഷി വകുപ്പും വകുപ്പിനു കീഴില്‍ സംസ്ഥാനം മുഴുവന്‍ വ്യാപിച്ചു നില്ക്കുന്ന കൃഷിയാപ്പീസ് ശൃംഖലയും ഉദ്യോഗസ്ഥന്മാരും ഇതിനൊക്കെ പുറമെ ഒരു കാര്‍ഷിക സര്‍വ്വകലാശാല പോലും കാര്‍ഷികരംഗത്തെ പുരോഗതി ഉറപ്പു വരുത്താന്‍ നമ്മുക്കുണ്ട്. ഓരോ ബജറ്റിലും മാന്യമായ വിഹിതം ഈ വകുപ്പിനും കിട്ടുന്നുണ്ട്. എന്നിട്ടും നാള്‍ക്കു നാള്‍ കൃഷി വേരറ്റു പോകുന്ന അവസ്ഥയുണ്ടാകുന്നതെന്തുകൊണ്ട് എന്നു തിരിച്ചറിയാന്‍ , അതിന് പ്രായോഗികപരിഹാരനിര്‍ദ്ദേശം നല്കാന്‍ നമ്മുടെ വിദഗ്ദ്ധര്‍ക്ക് സാധിച്ചിട്ടില്ല. കാര്‍ഷിക സര്‍വ്വകലാശാലയുടെ വൈസ് ചാന്‍സിലര്‍ ഏത് പാര്‍ട്ടിയുടെ നോമിനിയാകണം എന്നത് ഒരല്പം മുമ്പ് മാദ്ധ്യമങ്ങളില്‍ നാം കണ്ട ഭരണപ്രശ്നമായിരുന്നു. കൃഷി ഇല്ലാത്ത സ്ഥിതിക്ക് ഈ വകുപ്പും സര്‍വ്വകലാശാലയും അടച്ചു പൂട്ടുകല്ലേ വേണ്ടത് എന്ന് ആരും ചോദിച്ചില്ല.

അനധികൃത കൈയേറ്റങ്ങള്‍ ഒഴിപ്പിക്കുന്നതിനു പിന്നാലെ കൃഷിഭൂമിയുടെ കാര്‍ഷികേതരവിനിയോഗം തടയാനുള്ള നടപടി സര്‍ക്കാര്‍ കൈക്കൊള്ളുമെന്നു മുഖ്യമന്ത്രി പ്രഖ്യാപിച്ചിട്ടുണ്ട്. പരമ്പരാഗതകര്‍ഷകന്‍ തന്റെ ഭൂമിയില്‍ നിര്‍ബന്ധമായും കൃഷി ചെയ്യണം എന്നു സര്‍ക്കാരിന് നിഷ്കര്‍ഷിക്കാനാകുമോ? കൃഷി ചെയ്യാത്ത പാടങ്ങള്‍ സര്‍ക്കാരിനു പിടിച്ചെടുക്കാനാകുമോ? പിടിച്ചെടുത്ത ഭൂമിയില്‍ കൃഷി ചെയ്യാന്‍ സര്‍ക്കാരിനു സംവിധാനമുണ്ടോ? ട്രെയ്‌ഡ് യൂനിയനെക്കൊണ്ട് അവിടെ കൃഷി ചെയ്യിക്കാനാകുമോ? അങ്ങനെ ചെയ്യുന്ന കൃഷി ആദായകരമാകുമോ? കാര്‍ഷികരംഗത്തെ പ്രതിസന്ധിയെത്തുടര്‍ന്ന് നിരവധി കര്‍ഷകര്‍ ആത്മഹത്യയില്‍ അഭയം തേടിയ ഒരു സാഹചര്യമാണ് കൃഷിയുമായി ബന്ധപ്പെട്ട് കേരളത്തില്‍ നില നില്ക്കുന്നത് എന്ന യാഥാര്‍ത്ഥ്യബോധത്തോടെയല്ലാതെ ഇക്കാര്യത്തില്‍ കൈക്കൊള്ളുന്ന തീരുമാനം എന്തായാലും ആപല്ക്കരമാണ്.

കാര്‍ഷികരംഗത്ത് ഒരു പ്രായോഗികബദല്‍ എന്താണ്? സര്‍ക്കാരും ഭൂവുടമകളും കര്‍ഷകരും ഒത്തുചേരുന്ന സംയുക്തസംരഭമല്ലാതെ വേറെ എന്താണ് പ്രായോഗികമാവുക? വ്യവസായരംഗത്തും അടിസ്ഥാനസൌകര്യവികസനത്തിലും സര്‍ക്കാര്‍ മുതല്‍മുടക്കുള്ളത് പോലെ കാര്‍ഷികോല്പാദനത്തിലും സര്‍ക്കാര്‍ മുതല്‍ മുടക്കല്ലാതെ വേറെ മാര്‍ഗ്ഗമൊന്നുമില്ല. കാര്‍ഷിക സര്‍വ്വകലാശാലയും കൃഷിവകുപ്പും വരമ്പത്ത് നിന്ന് കൃഷി ഉപദേശകരായിരിക്കുന്നതിനു പകരം കര്‍ഷകരോടൊപ്പം ഈ കൂട്ടു സംരംഭത്തില്‍ പങ്കാളികളാകണം. കൃഷി ലാഭകരമായി നടത്താനുള്ള തങ്ങളുടെ സാങ്കേതികപരിജ്ഞാനം അവര്‍ അങ്ങനെ പ്രാവര്‍ത്തികമാക്കിക്കാണിക്കട്ടെ. ലാഭത്തിന്റെ ഒരു പങ്ക് അവര്‍ക്കും അവകാശപ്പെട്ടതു തന്നെ. എന്‍ഡോസള്‍ഫാന്‍ പോലെയുള്ള മാരകവിഷനിര്‍മ്മാതാക്കളില്‍ നിന്ന് കൈപ്പറ്റുന്ന കിംബളത്തെക്കാള്‍ മാന്യതയുള്ളതാണ് ഇങ്ങനെ ലഭിക്കുന്ന ലാഭവിഹിതം. അത് നിയമപരമാകാവുന്ന വിധത്തിലുള്ള കൂട്ടുസംരംഭത്തെക്കുറിച്ച് നമ്മുക്ക് ആലോചിക്കാം. കാര്‍ഷികരംഗത്തെ പ്രായോഗികബദലിനെക്കറിച്ച് നമ്മുക്ക് ചിന്തിക്കാം.

തര്‍ജ്ജനി പ്രവര്‍ത്തകര്‍