കാത്തിരിപ്പിന്റെ സാദ്ധ്യതകളെ വിവിധതലങ്ങളില്‍ വിനിയോഗിക്കാന്‍ സാധിച്ചതും കഴിഞ്ഞ നിയമസഭാതെരെഞ്ഞെടുപ്പിന്റെ സവിശേഷതകളില്‍ ഒന്നായി വരും. എങ്കിലും മൂന്നുഘട്ട പോളിംഗിനും ഫലപ്രഖ്യാപനത്തിനുമായെടുത്ത കാലതാമസത്തേക്കാള്‍ പ്രാധാന്യം മുഖ്യമന്ത്രി ആരെന്നറിയാന്‍ മലയാളികള്‍ക്ക്, തമിഴരെയും ബംഗാളികളെയുംക്കാള്‍ കൂടുതല്‍ ദിവസങ്ങള്‍ കാത്തിരിക്കേണ്ടി വന്നു എന്നതിനുണ്ട്. കാരണം ഇടതുപക്ഷം അധികാരത്തില്‍ വരും എന്നു ഏറെക്കുറെ തീര്‍പ്പായിട്ടാണ് ഭൂരിപക്ഷവും ബൂത്തുകളില്‍ ചെന്ന് ചൂണ്ടുവിരലുകളില്‍ മഷിയിട്ടത്. എക്സിറ്റ് പോളുകള്‍ കാര്യങ്ങള്‍ കടുകിട തെറ്റാതെ, വെടിപ്പായി ജനത്തിനു പറഞ്ഞുകൊടുക്കുകയും ചെയ്തു. പ്രവചനങ്ങള്‍ക്കെല്ലാം അതീതമായി കിടന്നത് ഒന്നു മാത്രം. മുഖ്യമന്ത്രി ആര്?